APARCADOIRO DE BICICLETAS E PATÍNS

 Xa comezaron as obras para a realización do noso aparcadoiro de bicicletas e patíns. Ao longo do verán acondicionarase este espazo para que á volta de vacacións xa podamos utilizalo.

A SEGURIDADE VIAL: VÍDEO PARA NENOS E NENAS

 Agora que esta a piques de rematar o curso compartimos este vídeo que pode servir para lembrar algunhas das cousas vistas durante este ano e que tamén pode servir de punto de partida para o seguinte.

Talleres de Educación Vial

O alumnado de 3º ciclo de educación primaria realizou no día de hoxe uns talleres prácticos de educación vial nas pistas polideportivas do Paseo Marítimo de Sada. 

Baixo a supervisión  de técnicos da Dirección Xeral de Tráfico de A Coruña experimentaron todo o que implica desprazarse polas vías públicas, tanto como conductores/as como de peóns.

Máis fotos e vídeos nos blogs das aulas

Plan Director de Convivencia: Educación Vial

Dentro das actividades programadas pola Comisión de Convivencia do Centro, coa colaboración da Asociación de Nais e Pais, hoxe o alumnado de 5º e 6º cursos de Educación Primaria participou dentro do Plan Director de Convivencia nunha charla sobre Educación Vial.

Taller de habilidades en bicicleta

O alumnado de 3º e 4º de educación primaria participou no día de hoxe nuns obradoiros de habilidades en bicicleta nas pistas polideportivas do Paseo Marítimo de Sada para aprender os conceptos básicos para andar en bicicleta a través de xercicios básicos. A actividade estivo dirixida por un técnico de Educación Vial da Xefatura Provincial de Tráfico da Coruña.

Fotos 3º EP

Fotos 4º EP

Visibilidade nos nosos desprazamentos

Cando desprazámonos como peóns polas rúas é moi importante estar visibles para os diferentes vehículos que podemos atoparnos. Os nosos brazaletes do Camiño Escolar Seguro axúdannos a logralo.

Talleres con Stop Accidentes

O alumnado de educación primaria participou nuns talleres  sobre educación vial da man de Guillermo e e Ángela, técnicos da Asociación Stop Accidentes https://stopaccidentes.org/

Esta iniciativa está enmarcada na posta en marcha do Camiño Escolar Seguro no noso centro, coa que pretendemos desenvolver un proxecto relacionado con cambios nos hábitos de desprazamentos cara a modelos máis seguros, activos e sostibles. 

Thisty 30

Thirty é un personaxe animado coa forma do corazón das Cidades30, coa que levar a seguridade viaria aos alumnos de Educación Primaria. Este recurso dixital da  Dirección Xeral de Tráfico plasma, dunha maneira animada, as condutas viarias correctas e incorrectas nos desprazamentos que fai un neno, xa sexa como peón, como usuario de bicicleta ou patinete, como pasaxeiro de vehículo privado ou transporte público…

Despois do talleres de educación vial que realizamos no centro incorporamos a Thisty para fomentar os hábitos de mobilidade sostible e segura.

Clica na imaxe para acceder ao contido web

Talleres de mobilidade sostible e segura

No día de hoxe tiveron lugar uns talleres impartidos por técnicos de Educación Vial da Xefatura Provincial de Tráfico da Coruña para promover a creación de novos hábitos relacionados con cambios nos desprazamentos cara a modelos máis seguros, activos e sostibles tanto como peóns, ciclistas ou usuarios dos diferentes medios de transporte.

1. “Taller de peón e pasaxeiro” para 1º, 3º e 5º, afondando cada vez máis nestes aspectos dependendo do curso.
2. “Taller de bicicleta, pasaxeiro de autobús e código PAS” para 2º, 4º e 6º. Nestes cursos repasaremos os conceptos máis básicos de peón e pasaxeiro (uso do cinto de seguridade), e afondaremos no tema da bicicleta (elementos de seguridade, como circular, algúns sinais…), como subir e baixar do autobús, e o código PAS.

 

Entrega dos brazaletes

Hoxe realizamos a entrega dos primeiros brazaletes do noso Camiño Escolar Seguro aos nenos e nenas de 4º de educación primaria que están inscritos nel. Ao ser reflectantes aumentan a visibilidade de peóns, ciclistas e deportistas en condicións de pouca luz ou durante a noite. A súa función é reflectir a luz dos faros dos vehículos cara ao condutor, alertándoo da presenza dunha persoa a unha distancia moito maior.

Parking para bicicletas e patinetes

A finais do curso pasado elaborouse un proxecto para habilitar un espazo no que os nenos e nenas que accedan ao colexio en bicicleta ou patinete poidan aparcalos de forma segura dentro das instalacións do propio centro.

Pavimentarase a zona sen uso contigua ao portalón de entrada situado máis ao sur, deixándoa á mesma cota que o acceso ao patio do colexio e conservando a árbore existente. Eliminarase o acceso situado na esquina suroeste da parcela (que non está en uso) substituíndoo por un tramo de muro de peche das mesmas características que o existente.

Este proxecto precisaba da aprobación da Dirección Xeral de Patrimonio Cultural da Xunta de  Galicia, o informe favorable remitiuse ao concello de Sada a finais do mes de agosto. No mes de setembro trasladouse ao arquitecto municipal para que elaborara o seu. Estamos á espera do mesmo para que o concello inicie o proceso de contratación da empresa que se encargara da súa realización.

Os peóns

 Coa posta en marcha do noso Camiño Escolar Seguro tentamos fomentar unha mobilidade sostible e seguro. Cando actuamos como peóns temos que ter en conta moitas cuestións, neste enlace da Dirección Xeral de Tráfico tedes moita información que seguro que será de gran axuda.

Desde o Xabarín Club comparten un vídeo con consellos para o momento de cruzar a rúa.

Consellos para conducir con xeo

Na época do ano na que nos atopamos e debido ás condicións climatolóxicas é frecuente que se formen placas de xeo na carretera. Compartimos un vídeo cuns consellos da Dirección Xeral de Tráfico para afrontar esta situación

Mobilidade en bicicleta II

 O uso da bicicleta ten unha serie de beneficios entre os que se atopan a mellora da saúde física e mental, reducindo o sedentarismo e o risco de padecer certas enfermidades. Reduce a conxestión e o estrés que se produce polo tráfico. Reduce ruídos, as emisións de CO2 e contribúe ao aforro enerxético. Compartimos convosco a segunda entrega de vídeos relacionados co uso da bicicleta.

Mobilidade en bicicleta I

Desprazarse en bicicleta é unha forma eficiente, económica e ecolóxica de transporte que ofrece grandes beneficios para a saúde física e mental, permitiendo evitar atascos e conectar máis coa nosa vila, Facelo require dunha bicicleta adecuada, equipamento de seguridade e coñecer as normas viarias para acadar unha mobilidade sostible e segura. Aquí tedes a primeira entrega dunha serie de vídeos que seguro que serán de gran axuda.

Seguridade vial para nenos e nenas

 A seguridade vial ten multiples factores e cuestión importantes a ter en conta. Aquí tedes un pequeno vídeo no que podemos aprender un pouco máis sobre ela.

Programa Innova-Lab: Sosti-Lab

O Programa Innova-Lab convocado pola  Dirección Xeral de Ordenación e Innovación Educativa ten como finalidade promover que os centros leven a cabo actuacións para desenvolver proxectos de innovación educativa. O noso centro que solicitou a participación na modalidade Sosti-Lab, que no noso caso xirará principalmente arredor do desenvolvemento do Camiño Escolar Seguro, foi un dos seleccionados

Plan Proxecta

O Plan Proxecta+ é unha iniciativa da Consellería de Educación, Ciencia, Universidades e Formación Profesional, en colaboración con diferentes organismos, dirixida a fomentar a innovación educativa nos centros a través de programas educativos que promovan o traballo cooperativo, interdisciplinario e competencial, pero que ademais estean comprometidos coa consecución dos obxectivos de desenvolvemento sostible da Axenda 2030.

Somo un dos centros seleccionados para participar na modalidade Mobilidade Sostible e Segura.

Aquí tedes acceso a toda a información 

Novos materiais para o Camiño Escolar

Para este curso 2025 2026 temos novos materiais para os participantes no Camiño Escolar. Elaboramos brazaletas e bolsas fluorescentes que nos axuden a identificarnos cando estamos pola rúa. Unha vez que se remate coa súa fabricación e impresión procederemos ao seu reparto entre aqueles nenos e nenas que teñan unha participación asidua no Camiño Escolar.

A.N.C.A.S. minuto

 Aquí tedes os distintos itinerarios propostos para acceder camiñando ao colexio. Os puntos de encontro están sinalizados no chan. Algúns deles precisan de reposición, polo desgaste ou por ruturas, proximamente procederemos á súa  substitución.